Iż-Żoni Marittimi Protetti (MPAs) huma żoni marittimi magħżula għall-iskop ta’ konservazzjoni u maniġjar. Dawn iż-żoni huma maħsuba biex jiġu ppreservati u protetti l-ħajja u l-abitati tal-baħar fi ħdanhom, filwaqt li jiġi promoss l-użu sostenibbli ta’ dawn ir-riżorsi L-għan tal-MPAs huwa li jiġi żgurat li l-ibħra tagħna jibqgħu b’saħħithom u mimlija ħajja għall-ġenerazzjonijiet tal-llum u tal-futur!

In-network Natura 2000 tal-baħar ta’ Malta jinkludi 18-il sit u jkopri aktar minn 4100 km2, ekwivalenti għal aktar minn 35% taż-Żona ta’ Maniġjar tas-Sajd ta’ Malta, stabbilita għall-konservazzjoni t’abitati u speċijiet importanti. In-network jinkludi Żoni Speċjali ta’ Konservazzjoni (ŻSK), magħżula għall-protezzjoni tal-abitati u tal-ispeċijiet marittimi skont id-Direttiva tal-UE dwar l-Abitati, u Żoni Protetti b’Mod Speċjali (ŻPS) magħżula għall-protezzjoni tal-għasafar tal-baħar skont id-Direttiva tal-UE dwar l-Għasafar.

L-MPAs ta’ Malta jfittxu l-konservazzjoni tal-alka (Posidonia oceanica) – li hija abitat ewlieni għall-bijodiversità kostali, l-għerien u l-abitati ta’ skoll. Fil-fatt, il-Posidonia oceanica tissejjaħ ukoll inġinier tal-ekosistema billi tipprovdi abitati lil varjetà ta’ fawna tal-baħar.  L-ispeċijiet protetti permezz tal-MPAs jinkludu l-Gibbula ta’ Malta (Steromphala nivosa), il-fekruna tal-baħar loggerhead (Carretta carretta), id-denfil bottlenose (Tursiops truncatus) u tliet għasafar tal-baħar li jnisslu fil-Gżejjer Maltin: iċ-ċiefa (Calonectris diomedea), il-garnija (Puffinus yelkouan) u l-kanġu ta’ Filfla (Hydrobates pelagicus).

Filwaqt li huwa essenzjali li jiġu deżinjati l-MPAs, l-effettività tagħhom hija strettament marbuta mal-livell ta’ involviment tal-komunità lokali fl-appoġġ għall-politika u l-miżuri ta’ protezzjoni tal-baħar, kif ukoll fl-impenn għal soluzzjonijiet aktar sostenibbli!

Agħfas hawn biex tara mappa virtwali taż-Żoni Marittimi Protetti ta’ Malta: https://oceana.maps.arcgis.com/apps/MapSeries/index.html?appid=6b6c687101b841588dc91b84d3a25ef3